Posts

Showing posts from June, 2009

Good Taste in Wai Kee

Image
「好味就係維記!」 唔係講牛奶,而係茶餐廳。尋晚去高登,所以係深水埗醫肚。之前係OpenRice.com 睇下深水埗有乜好食,第一位遙遙領先既係一間叫做「維記咖啡粉麵」。初頭睇時諗,咁普通既茶餐廰有乜好呢?反正經過,抱著姑且一試既心態去。 果間茶餐廳有兩間舖,七點幾去到時都坐滿人,要排長龍。好彩流轉都好快,因為間餐廳無乜野揀,唔係麵就係多士,三四個字就有人走,我地就可以「逼」入去。 因為真係無乜好揀,所以點左最特別果兩樣:豬潤麵同加映多士。其實我唔好豬潤,而且果碗野既碗邊黐左一堆堆豬潤碎,賣相零分。唔叫都叫左,惟有食啦。 一放入口,嘩!好味呀!我忍唔著叫左出來。豬潤爽口彈牙,軟度適中,唔同平時煲湯淋泊泊,而且味道鮮美濃郁,麵身同湯底都一樣好有味道,最奇係湯清味濃,簡直教人停唔到口。我張成碗湯都飲哂。 加映多士都好特別。一塊看來平平無奇既多士,只係加了少少既甜醬,唔太甜,啱啱好,多士又依然脆口。正! 專心一致,做好本份,就算蔡生同煲呔無來過,大家一樣識欣賞既。不過好似佢地一生懸命既,係香港地就買少見少嘞。